Cours de paléographie N° 51

Niveau de difficulté : ****

Donation d'une vigne par Perronnelle, veuve d'Henri Sejorné, aux religieuses de Jarzay (1288).

Texte rendu difficile par la confusion entre e et o. Eugène Hubert l'a publié dans le "Recueil des chartes en langue française du XIIIe conservées aux Archives départementales de l'Indre..." dans la Revue du Centre de 1885.

Transcription :

[1] Saichent tuit present et avenir que presente endroit en la cort mon seignor le conte d'Aucuerre a Valancey Perronele,
[2] femme jadis feu Henri Sejorné, adonques veive et dame de soi, si comme eile disoit, volenz et entendenz quant a ce, si comme eile disoit, te-
[3] nir et garder et acomplir la volenté et le feit feu Osanne dite jadis La Chardone, vost et ottroia en la dite cort que une
[4] piece de vigne assise en Champ-Gaydon, joignant d'une part a la vigne au dit feu Henri et d'autre part a la vigne madame Johanne
[5] d'Argy, laquelx piece de vigne estoit eschoieté a la dite Peronele, si comme eile disoit, de la succession de la dite feu Osanne, et que ice-
[6] le Osanne havoieit donée et lessiée por le salu de s'ame et en ausmosne aux religieuses noneins a la prioresse et au co[n]vent
[7] de l'eiglise de Jarzai et por son anniverseire feire chascun an perpetuaument en la dite eiglise, soit et remaigne a toz jors meis senz tot
[8] contredit a la prioresse et au convent devant diz et a la dite eiglise. Et lor a lessié et ottroié et quitté a touz jourz meis senz rap-
[9] -peler en la dite cort, la devant dite Perronele lesse et ottroi et quittence feites entre veges genz, et la dite piece de vigne et tote
[10] l'action, droiture et reison, proprieté et saisine que eile y havoit et havoir pooit et devoit en quelxcunque meniere et par quelxcunque
[11] cause, reison ou tistre que ce fust. Et ha promis et promeit en la dite cort la dessus dite Perronele par sa foi et souz l'obligacion
[12] de soi et de ses hoirs et de touz ses biens muebles et non muebles presenz et avenir que eile desja quant a ce sozmis et sozmeit
[13] de tot en tot a la juridition de la dite cort, a tenir et a garder bien et leaument icest sien devant dit ottroi et iceste soe (?) devant dite lesse
[14] et quittance senz venir encontre. Et que en la devant dite piece de vigne action ne droiture nule a havoir ne demandera ne
[15] ne requerra ne a demander ne a requerre n'essaiera par soi ne par autre jameis en nul temps par nule meniere. Et se eile le feisoit
[16] et les dites religieuses ou lor comandement en feisoient ou en estoient endomagiées en quelzque meniere que ce fust, iceiz couz et iceiz do-
[17] maiges lor ha promis et promeit la dite Perronele par sa foi et souz la dovant dite obligation a rendre et a amander enterinement au serrement de ce-
[18] lui qui cestes lettres portera, senz autre prove. Ce fut acordé et juigié endroit en la dite cort, sauf le droit au dit conte, le mercredi emprés
[19] la feste saint Bertholomé l'apostre en l'an de grace mil CC quatre vinz et oict.

[au verso] : [en haut XVe s.] letre pour la mayson et vigne de Saint Aingnan ; [au milieu à gauche, écriture XVIe s. très pâle] : Lettres de quattre soulx de rente assis sur ung arpent de vigne assis prés
Saint Aygnen ; [au milieu, dans l'autre sens] : littera de domo Sancti Aniani et de vinea Sancti Aniani
[plus bas] : aux noneyns de Jarzai

Découvrez ici le document en haute définition (P1)
Découvrez ici le document en haute définition (P2)